紅豆栗子十六榖飯（四人份量）

 煮飯，洗好米量好水，放入電飯煲按個制，好容易

不過，有時候想將一碗白飯變得更加好食，就不妨花少少心思

尤其秋冬天，溫度低，人要保暖就自然會食多一點

不想吃太多肉類，又不想食太多白米，在煮飯時加入紅豆和栗子

一方面可以增加飽肚感，也可以令一碗平平無奇的白米飯增添香氣和暖意，煮好後灑上少許炒香過的黑芝麻，一碗飯的營養成份豐富了之餘，還有補腎功效，秋冬天最適合不過

只是，紅豆又硬又大粒，要浸透又要煲夠時間才好食，要如何處理才好？其實有一個好簡單又方便的做法，不用預先蒸煮，放入飯煲煮都可以做到又香又腍的紅豆飯，秘袂就係將浸好的紅豆放入冰格，雪過之後的紅豆跟用冰米煲粥的道理一樣，受熱之後裂開快熟和容易腍，可以節省將紅豆蒸煮的時間，一煲過，放便又好味

材料：

珍珠米         一杯

栗子         八至十粒

紅豆         兩湯匙

十六榖米         一湯匙

調味料：

油          半茶匙

鹽          1/4茶匙

味醂 一茶匙

料理酒         一茶匙

做法：

1. 紅豆沖洗好，用熱水浸十二小時後換水，再浸十二小時，倒去水後放入冰格四小時至一日，煮飯前一小時放室溫解凍

2. 十穀米沖洗好，用熱水浸過面，浸半小時至一小時即可

3. 栗子放入清水中，煲至滾起後關火，撈出用毛巾包住，用手掌輕輕推幾下至栗子外皮脫下後，留起栗子肉待用

4. 珍珠米洗好，再倒入十穀米、栗子及紅豆，最後放調味料，用筷子將材料和調味料攪勻後，建議用一般程序將飯煮熟（視乎不同電飯煲，通常需要四十分鐘以上），如果用快煮模式（大約二十分鐘），栗子和紅豆會較硬

5. 將飯用碗裝好，再灑上少許熟黑芝麻，即成美味又有養生補腎功效的紅豆栗子十穀飯