靑邊鮑魚花膠煲嘉美雞湯 (3-4人份量)

我有一個很喜歡買罐頭鮑魚的姐姐, 一趁減價就入定貨, 她家中隨時有十罐八罐儲備

因為車輪鮑愈賣愈貴, 所以通常買澳洲或紐西蘭的貨

從前家中做節, 無論是中秋、冬至或者團年, 姐姐就會帶一、兩罐鮑魚回來

有時侯一罐有一、兩隻, 有時侯一罐有六至八隻

媽媽通常會用來煲湯, 連同其他材料, 煲起的湯有很多, 有時候八個人都飲不完

餘下的湯和鮑魚,  我通常會在第二天早上用來煮早餐

先將即食麵(通常是一丁啦)淥好, 隔乾水, 再倒入翻滾過的隔夜湯和鮑魚!!

這是我很喜愛又好好味的早餐呢!

由於現時我煮的份量通常不多, 怕一罐太多,   所以通常用散裝乾貨或急凍貨

煮好就晚餐一次過食清光, 所以已經很久沒有吃過鮑魚湯一丁了!

下次再煲都真的要留一些給自己做早餐呢!

材料:

青邊鮑魚(小型)  6隻

細隻美國螺頭   6隻

象拔蚌乾       6條

瘦肉           4兩

桂圓           10粒

無花果         3個

宗谷瑤柱碎     半碗

嘉美雞胸           一件

花膠           3件

薑             6片

蔥段           適量

陳皮           1角

解凍後的澳洲青邊鮑魚, 用來煲湯好鮮味

1.  瑤柱碎、象拔蚌乾、小花膠和美國小螺頭清洗好, 用暖水浸三至四小時 (浸瑤柱和螺頭的水留起待用); 青邊鮑解凍後, 以生粉和粗鹽清洗乾淨, 放入清水中, 與花膠一起跟薑蔥以小火煲過去除腥味後, 就可以原隻用來煲湯;煲好的鮑魚撈起, 跟花膠一起用蠔油煮好鋪在蔬菜上面, 就成為另一道餸菜; 螺頭浸軟後剪去腸, 沖好隔乾水待用

2.   瘦肉和雞胸洗乾淨,放入鍋中跟兩片薑與清水以小火煲十五分鐘, 好讓肉內的雜物和血水排出, 煲出來的湯水會清澈得多

3.   桂圓和無花果沖洗過後, 放入清水中浸十至十五分鐘至軟身後撈起備用;陳皮浸軟待用

4.   已汆水的瘦肉、雞和鮑魚沖乾淨, 花膠撈起隔乾水待用; 所有材料準備好(花膠除外), 連同浸螺頭的水一共八碗注入鑄鐵鍋中, 放入兩片薑和陳皮, 連同所有材料倒入鍋中, 以中大火煲滾, 滾起三十分鐘後轉小火, 煲兩小時後放入花膠, 小火煲三十分鐘後即成, 因為用鑄鐵鍋的鎖水功能比較好, 煲好的湯都有差不八碗, 足夠三至四人飲用

新鮮嘉美雞, 雞胸、內臟、雞腳和頸用來煲湯, 其餘的雞髀和背留來煮其他餸菜

**

花膠煲得太久會變成糊, 所以視乎花膠的體積大小, 這款小花膠飲之前半小時放入去煲就可以